Í áratugi hefur bandaríska geimferðastofnunin NASA reitt sig á svokallað TDRS-gervihnattanet til að halda sambandi við geimför, rannsóknargervihnetti og Alþjóðlegu geimstöðina. Þetta mikilvæga samskiptakerfi, sem virkar líkt og netbeinir (e. router) úti í geimnum, er nú farið að láta á sjá. Vandamálið er að mörg eldri geimför á braut um jörðu eru með gamlan vélbúnað sem hvorki er hægt að uppfæra né tengja við nýrri og nútímalegri fjarskiptanet. Ef gamla kerfið hrynur gætu þessi geimför misst allt samband við stjórnstöðvar á jörðinni.
Til að koma í veg fyrir þetta hefur NASA hleypt af stokkunum verkefninu NEXUS. Stofnunin kallar nú eftir tillögum frá einkageiranum um hönnun, uppsetningu og rekstur á nýju fjarskiptaneti. Krafa NASA er að nýja kerfið verði svokallað afturvirkt (e. backward-compatible) á hinu ofurhraða Ka-tíðnisviði. Það þýðir einfaldlega að nýja netið verður að geta „talað“ við eldri geimförin á þeirra eigin tungumáli og tekið við gögnum frá þeim, jafnvel þótt tæknin á bak við nýja netið sé glæný.
Markmiðið er að nýja kerfið verði komið í gagnið á árunum 2029 til 2031, áður en hættan á sambandsleysi verður of mikil. NASA ætlar sér þó ekki að smíða eða eiga kerfið sjálft. Þess í stað vill stofnunin kaupa aðgang að því sem þjónustu af einkafyrirtækjum, líkt og þegar almenningur kaupir internetáskrift. NASA vonast til að fyrirtækin geti selt öðrum viðskiptavinum aðgang að þessu nýja geimneti og þannig tryggt örugg og hagkvæm geimsamskipti til næstu fimmtán ára hið minnsta.